Kamis, 29 November 2012

Laran Adat .....



Suku weken kaen ne laran adat naen masin masin ,pukon naran naen Koda ...jadi tite weken kaen kia taan be tulis hala ,hege ata bapan te benisan dore pana laran adat rete rawa maka kia rae te benisan .
Tutu koda goen pali wali pukon naen ni wi :
1/ Kitab Suci Agama wi ata raan be tulis nekun kodan ne artin naen aja loke titen wi tulis tou ditake wi kia nene pa soron bapa goen,bapa goen soron goe di goe kodi soron ana goen.Koda tite tete wi benolan noon ka take ? kia noon haluku ? .Tou tutu tou tali tou epu koda naan bene aja .
2/ Adat wi hege ata tukang pele liko ? tou marin ni tou peli papa marin ni ,naan bine kaka arin di majan wekit hala wahak pukon luan koda elen . Tite ne Tuan Allah nekun tobo koda adat kae Tuan Allah tite gelupa nain ,pukon naen kalo Adat onon we tite herun koda cinta kasih tenaken ...HEGE ATA NAAN NALAN NE KODA ADAT MAKA NAE TANGGO JAWAB ....peen we naan goe menyesal sama sekali .
3/ Ata maten hege ata yang tanggo jawab we....Gereja ka Lango Adat.Gereja nekun sembayan ne siren berkat wai berua di kae, nekun Lango Adat ,buun bain roho robak ,pasan tenda ,sepin sira,EREN PIRA kerian urusan ata maten wi tite bisa taan nekun TOBO weken kaen sembayan hena, taan tekan tenun  NAWA, ata maten tite taan roho robak sain wawe ulon pulo dibisa wi ? .Goe marin kalo goe jadi Bupati ka jadi Kepala Desa maka goen majan marin bapa suku ne ketua sukun weken kaen epu di goe marin MIO SUKA KA SUKA HALA aturan tekan tenun urus ata maten nekun sembayan ne tenu  wai hena !
4 / Tite wi kalo adat koda wahak hala mor maka sain cucu cece ence pelence wahak hala, pana majan pelala pelea wekit di gesik.
5/ Adat wi pangka naen bele loke ...moe dore maan mae mae hala maka koda keneruns teka mihin.Nekun goe onok marin adat we mesen ator tite naan bine kaka arin polo meten te mae...kewegon kenggo weol heti lagi bisa mopa. Naan bine titen kaka arin titen koda nalan tou maka pai detan hanan nae marin nae taan mae mae,ekan taan menekel sain herenai kepo kia baru tite tobo tani gilen garen ekan punak .
6.Umpama nae wi ....hae mata laran adat naen getan hala mor nekun todi toda robok laran adat naen lengat teka te ana cucun naen nekun mio hukut ka take ne nae yang mata nolo we ....nae kia maso surga onon ka take ? laran pate adat getan hala mor wi?



Koda kirin goen piin nekun kaan tulis hena polo ana cucu goen bele gere di rae di roi berua ....

Rabu, 21 November 2012

Pa goen Inggu e

Pa goen Inggu sayange
pi laran legulon sepat to moe
nolon limak gewajan kebako batan tou
nekun pi weli nai kaan kete padu hena kae
moe moi ka take goe peten moe loke
onom moe kuran nekun tene hena di maan be marin te goe
ata iker moe maan tobo bemerenk hamu
sayang goen pa goen Inggu
moe hukut ka take tapo eu lali Lamawalan
pe hewak netak kerama kedila deket loke
lali Heras pe kajo pukon belen tou hutun
busan utan naan horon anan nae te hetun
pe lau Sabu Ina Poar kia uli peen nolon
nekun tite mehat yang pelewank pe lodo we
Rae orin rekan pao paja pukon belen tou huan nawa toren woel
leron hae herun ula Kemea pe orin peen we
nuan tahan weten tawa gere
besi ubun gepu soron mama rebos
sasi onon mean kenulun tenaken borik pe tana onon we
Wata belolon tawa gere sama belola kemerun di dore eran pehutun we
leron hae wewel bain kesaar legu wata belolon kajun di gero
Pekajus huan tajak lajak polen gadak pehutun we
rae orin ata Lewokun raen onon majan pelala pelea di sambo hala
halaku rae raan lango raen ne luo sain lali tana .
nuan peen kame kemosok hamu mor
kolon boun ne kolon But aja loke mor
nuan peen goe hukut loke mor
nekun kia goe tutu te hege ata muri wi .....
Pa Inggu e ..moe teti kelen onon kae
ekan onon kuran ne goe ...koda goen elen tou rua ne moe ka a tou ruan nalan noon
goe nena minta ampo ....sayang goen pa Inggu eee

Bala robun ........................

Inak goen take alek goen take
binek goen take koda laran goen take
tobo senusan legu hulik
kaan pana dore segan tega muri

witi wawe bala robun ekan tenaken
tobo dapet kuban belen leran wata era
honon ape nutok jebul rakak wojon hutun
onon take koda sain ketun hala

gasik telo getan rua hala kae
tou belesank kewegon nala papa nai
kasihan kame amut take
tobo lenggor depat tana lolon di artin tenaken
bemilan kelutan kia mio buka matak
peten kame pi raja keban ana onon

lango umak goen e.................

Ana tou chating ne goe te FB ,..nae gete goe " kaka e balik lewo hala maan a ne...moe kalo balik lewo kia terkenal loke,tula koda maan kantar aja loke we di !" .Goe tobo pe onok hamu,piin wi kia taan be genai muri wi ,weken kaen pana laran sain niwan larat doan loke kae.Marin balik nekun kia seba kerian a prae wali,Ata tede marin morin laran meranto wi sen loke nekun kia hama ne hala hae .laran heti lali lau rae ata raen hamu,Marin prae lewo to mae heti lali lau rae ne kaka arin kajak ajan hamu.

Pana laran taan genai muri ,pekot teti gawe lali
tubak lodo hedol gere pi uman miten kenapunt hamu
dore laran atan raen pana sain leik limak geruhunk diproin prokot bisa hala
Kaan tobo hukut lango goen nigun pat kaen getan
hukut heti wolo lolon lali likat tanah lolon
nuan leron matan getan peten hukut lewo tana sain wekit mae hala wahak
mian te lango umak goen sayange
goe hukut sain koda dewa
goe hukut sain matak wain mara
lango umak goen ne tanda mata goen
mian te leron tou goe balik lewo

Sabtu, 17 November 2012

Melawan Adat bisa ka take ?

Goe tobo pikiran berua .....bisa ka take taan melawan ne adat berua, Pi weli nai wi taan acara berua mesen ne adat ,weken kaen ne adat heti lali ajan hamu.Nekun tite marin wekit kalo dore adat hala maka ait resiko diajan hama ,hama ata marin koda pelatin.

Tite wi ata marin semba sujud loke ne adat raka ne ata kediken naen.Goe sain pali wali mengerti hala mor kalo tite marin kerian adat ne urusan adat .Adat we mesen sain maso te eret matat titen setiap saat ka ? Hege  ata yang pehen koda wahank weken kaen .Kepala suku ?

Goe coba tulis kenulun tou pali wali ....pantas ka take pana laran rete koda alant wi ana kemamu kebarek pi gere ? kalo peen goe terima hala sain pali wali. Tite marin semba sujud ne tetua adat nekun pana laran rete koda gewajan limak pi urin kemamu te aja kae.Tali tou muri ..tite marin pana laran adat nekun tite pasan ata tobo te  meja belake di raan be geasok ka marin wekik ka pasan tou piin ana piin mesen pasan ne piin polo rae tobo we di te pas.Goe marin piin elen ,pukon naen kalo taan hama ne tite bukan menghasilkan karya adat nekun peen hanya sebagai tanda adat.Kolo nekun ne hena ato tite marin taan baat wekit maka weken kaen tobo te onok di todi marin wekit "jadi belake ka opu we nekun tobo tutun deru kebako ne gike manuk koan hena hala ne ?"

Opu Belake goe paken hama jendral pana mesen wibawa ...tobo di mesen laen kelohok ...kalo pile wekit taan tobo te meja adat paling mae naen bukan nekun HEGE ATA BENISAN TOBO TUTU KODA ADAT,NEKUN WIBAWA ...BURAN KELOHONK ...

Pali goe jadi belake bauk ere rua ata iker jadi belake goen hama sambo rasa ....nekun jadi naen melawan adat bole hala .......kodi sambo muri ......

Kamis, 08 November 2012

Tani majan ......

sayang piin take kae
koda nimun gewajan dore di take kae
onok pana dore ukol nimok
pe lau watan dibain ran moen hala kae
rae Wato Netak disokot tine olak hala kae

kodi dore koda nurun naran nolon
pi tine hama ma hama hama
pi pasan wewa tama seridin di hama hama
nuan rae lau majan hege ata muri
kalanggae heti lali di take kae

mio e...onek belara dein pi laran piin
tani majan dihogo hala kae
tobo koda di bain raan hala kae

Senin, 05 November 2012

Sain teti papa nai ....

Pi laran likat paken leik limak nimun
pi koda liman senaren
pi ribun ratu lema golen likak goen
kaan leik limak sain huku bolak kae
di peroin belara hala mor

laran goen kodi sain teti papa nai
rua kae kuran tou gawe hama hama
pi onon ne atek luran senaren
kaan nena ekan gelupa goe ana wohon piin

Goe ne wekik goen

  Nolon kene mor pa goen marin 'ekan manja wekim moen bain,moe ata kaya rayan hala' Koda piin goe kete sain pali wali . Ata iker tur...