Tawa bele gere ana goen e...goe dein soron leik limak jaga moe...laran goe buka soron moe..laran goen mopa mopa..dore maan mopa mopa...Billie Dominic Prasetya Wibawa Tukan

Soron nenan teti Kelen

Goe tobo geluker te kenatan pe orin kenen tou te lango goen haanke.Pehen ne gitar tou tobo kantar kaan hukut peten lewo tana goen.Tuun tou ne hulan buto kae kame looke lango ekan amun pana maik iak ne tenuen langoke raen.Taan be a weken kaen pana seba ganti morit nekun peten wekit hena berua todi dore seba laran maen maen hamu.Lela lokek aja kae nekun pali wali ka,e marin petutuk wekik susa sena tekan tenun malu mara te lango titen nimun te mae.
Kame balik iak te lango kamen nekun dipikiran jaha hege ata kame bisa nein percaya naan bote ana kamen.Goe tobo sembayan kontas tou.Goe nenan lewo tana tuan tana Dewa Lera Wulan nein nonin laran soron nein kame.Nae soron kame nemuron .Kame ait oa tou ata Manggarai sain tei ne kame naan jaga bote helak ana kamen.Nekun goe pali wali onok belara jaha .goe soga telpon rae lewo tana tutu koda ne ema bapa goen .Kame petutu rencana pesta 50 tahun pa besa kamen Fr Valens BHK.ema ne bapa goen meten tua jaha kae,rae raan a tou di roi hala kae,epu bine noon ama raen di susa jaha kae.Lero hama weria nolon hala kae.Goe koda giar luan koda bereket aja te bapa goen .Nae tani marin goen " No e eeee..dai ne no..dai ne no...peten kame pia hala ne ..kame ruak maan a tou di moi hala kae..kame pia tua leren kae...dai ne no e ..dai ne no e...no eeee.. no eee dai ne noe..." meten tani meten petutu te telepon onon."No eeee pukon a ne ne weken kaen maike ..ana tou di jaga kame hala...!" Matake wain goen di beurunte..."Pa e e....laran weken kaen Tuan Allah tao kae...kame modi dore pana hena..ekan bekel ekan onom kuran,ekan luan koda elen teka kame.."Nae tani meten bele...goe marin nae " Pa eeee..laran moen lurus jaha ..goe dore laran moen...lurus jaha ..moe marin a weken kaen goe dore moe jaha,nekun moe tani pali wali maan goe di gehik jaha,,,,susa sena nolon tite pana tekan tenun hama hama..kuran di tite taan meren hamu...baat di baat jaha morit nolon sain pali wali nekun tite ana noon bapa taan laran maen hamu...koda moen laran moen kame dore maan mae mae....ekan bekel ekan onom kuram....." Pali leron goe hukut rae ruak jaha....malam bae pa Inggu mama Mia...Pana Laran doan jaha wi pukon taan seba ganti nasib...ekan onom kuran ekan onom wekeren...taan hama nolon we tobosembayan hama hama te patung keluarga kudus...nenan laran maen hamu soron tite...malam bae...goe peten mio goe hukut mio jaha....

Koda kenirin

Hepa bela
taja lajak
koli wolit
miten pekedan
kolor wolor
Ginge risek
bilabu
kotok matak benger
uran warat
ojok golo
soka selen
semo lemo
genan gabon
kimalamak






 

Koda kenirin

Sayang atek pali nokon piin goe hukut emak noon bapa rae lewo tana.
Rae doan ile lewo liko 
maan tonga tede di moir hala kae
Kame ana ata raan be sare
pana doan balik gawe laran papan

kenawe bolak liko laran kamen
Nenan wai matan pesol gere
jaga gera malu mara 
kame naan telo dein golit kebako
pe tukan kelamatan tapo ebo 
pe tangga kedosor  pukon 
maan atek onek sena
leron maen  daten take
pupul koda kelean beran maan naan ama teloke

rae ape likat luran 
ema noon bapa lain luan naran kamen
bolak laran belok dore  koda kame jaga lewak wahank

TEMAE ATA KEDIKEN BENISAN BEGO GERE

Goe lega suo te Facebook noon naan petutuk koda kenirin prae lewo hau,wekenkaen nuan piin petutuk lain koda "HEGE ATA HENA ROON NARAN GANTI BUPATI HUUN".Goe tobo geka alek sain gelerek.Koda petutu pelerek pelerek hama rae ata benisan alant hamu we.Ekan dimarin a we ka.Koda heke weken kaen te ata benisan alant hamu.Goe marin te onok "uok uman kenapunt hamu".Rae marin koda raen maen hamu,onok atek raen maen hamu.Pek ke di rae gete muri,hege ata yang temae yang bisa dein naan jadi bupati.

Koda kenirin weken kaen maen hamu,nekun mio tede ne peten rae tenuen nolon ka rae yang teik rae ile kolan.Morit raen sederhana jaha,rekan renun ketuun hala,logek lipa senai pe wekik hena,lango dein di leder ,renu wai di noro pe.Morit raen hama ne kewe nekun roi nokon legulon leron hena.Rae proin prokot aja hala.Rae nekun marin a naan lera piin pelate putuk jaha,anaan uran sain hala.Rae pikiran hala hege ata naran bupati,camat tao rae di gete hala bupati raen kerian a hena kae.Morit raen pana dore Dewa Lera Hulan.Koda raen nekun tou !" piin tenekan ka piin elen"Rae pikiran aja hala hege ata jadi bupati.

Rae tobo berkumpule te waterleden raan tuhu geka wekik.Marin wekik raan maen hamu.Koda raan elent tenaken.Weken kaen maen hamun.Nekun pi wi ana raen raik sekola raan jadi ata belen hamu kae.Balik lewo raan petutuk ne bahasa logat gehan kae.Rae mulai suk ladak lewo tana.Piin elen,piin mesi ni wi,goe main mio mesin dore .Pe weli nai we,koda ata benisan alant wali ku a,naan ata lewo tana bisa te pereto berua ka a.Pek meten lela nae naan wekin naen meten benisan,dore bulet babak wekin te patai politik,loge ne dasi jadi nae ata belen tali ne pangka ata benisan.Goe sekola lau tana jawa,goe piin bisa kaan lewo tana tali mae muri,koda goen elent tenake,mio pile goe,goe kaan mio meten mae muri.

Goe marin mio weken kaen ata benisan alan we" Mio gen wata ata lewo tana raen,mio menun wai ata lewo tana raen,mio gen doi ata lewo tana raen,pek kedi mio marin mio piin ata benisan alant kae?...uon uman nala kenapunt,mio maan a kae soron lewo tana.mio piin bego helut dore hulan hala ne.Maka mio peten ata lewo tana ne kalo mio te kerosi hutun kae,peten saja mio pikiran ketun hala mo,maka mio tula laran nein lewo tana.Mio piin benisan alant hamu jadi mio maan a weken kaen dore koda mion.

Goe kia kodi tobo sembayang hena ka,polo ata benisan alant rete pana laran raan maen hamu ka.Goe di herank berua,teman goen genato te facebook goen marin dukung ana ine piin wi,sain pali wali goe tapan koda kenirin tou dihala.Mio piin hege ata tou ne bisa ganggu gugat pikiran goe taan tuhu tenulak naran naen.Eeee...goe heron nae (calon bupati) palin wali te toko mitra 10 onen,nae hope keramik kia naan langon naen sebole,kia nae pelala pelea ne goe ne,tenaken.Pukon nae kena goe hala ku a jadi nae majan goe hala.

Nekun noro susa jaha nemuron pile ata kediken titen raan jadi bupati ka camat ka.Tite piin toir kae ka,rae tobo teti hutun kae,rae reso uok kae,tite biin belema selepot wahak.....rae piuk tite sain sisan kuhan di tenake,mei titen rae renun isek raan wahak.Rae raan jadi bupati we rae teik prae lewo nekun rae heke kae langsung helut,pinda teik te Jakarta,Jawa,Bali,morit raan sena wekik rete ne doi titen nimun prae lewo hau.Ekan bekel mio ata benisan alant hamu e...goe marin koda tou piin..."ekan di gute pirin lamak ata lewo tana raen,moe maan rae meten benisan di a hala nekun moe hukut ne lewo tana....lewo tana dore mei moen sain kepo,kalo moe maan mete laran elen

Sambung 02 / Cerpen : Oa Lena Kebarek maen tou

Rae ruak pana wegit raan beran hamu,hala ku a biasa nae guru raen dein pe pendopo sekolah erent,naan tobo gelinge geliar hege ata yang sain palin urin."He he he..Lena ..pai pia menghada goe pia! "gupk pa guru Paul dein lipat liman meten kebeler lena." ai hele,mata goe pali wali,Pak paul epet goe..."Lena meten te onon dug dag sama sekali."A naan moe sain pali wali telat jaha...tema moe weke kaen maka neku kae moe beten bego ....tede pia ...goe tutu ne moe wi.! pa Paul meten kerabit hala ku a,nae noir kae kalo soban naen lewa nolo kae pek ke di peken Lena urin."moe tede hege!" taka pa guru,goe minta ampo!."minta ampo a..leron matan getang sain paling kola,peten tenuen moen hala wi.Rae genato moe pai sekola ti nekun mae opon akal rae.".Pa guru hiin nae nemuron sama sekali.Koton naen benani hala tonga tede gere."pali wali goe nein ampo te moe,nekun moe maan ulange muri,moe modi moi ,goe kaan a ne moe,moe bain i Lena,pana rae maso kelas onen ,ekan sain telat muri!" "terima kasih aja jaha pak guru.""heenn ...kae we ,pana kelea ..! Pak guru Paul kerabit ne Lena pukon nae Lena ne pak guru Paul rae mei tou mor.Pa guru Paul aden ne anan naen we Lena.Jadi nae kia gehi jaha kalo ana onon naen ait masala te sekola.

Lena plae naan beran hamu maso kelas onon.Matan naen berani hala tede ulin te kola naen.Pukon naen pekola naen we soban naen tobo."moe a hala hi...Pa guru Polu wereken ne moe...."gete soban naen dore kola pai naan be biseke ."A ka ..ekan ganggu goe...tobo meren kia ...!.lena tapan soban naen hama noro kerabit berua soal naen soban naen pile laran te dahe dari pada nae.........Bersambung.....

Waibalun ne Seminari

Leron pertama goe ramak leik te Seminari Hokeng,bapa tuan tou gete goe ni"Maaf anak aslinya dari mana?" "Dari waibalun Pater!""O Waiablun ka...banyak yang masuk banyak juga yang keluar"Naran Paroki Waibalun te Seminari Hokeng we bele sama sekali,mungkin tite taan regestrasi ex seminari waibalun.Rae marin Waibalun penguasa te Sesado.Goe marin kia nemuron.Tite Waibalun nekun paroki kenen tou,ata raen iker hama Paroki Larantuka,Solor,Adonara,Maumere,Ende.Tite gehit gabon ne Jawa alant hala.taan tete wekit mehat.Pak Guru Servas marin goe ni "Kalian orang Waibalun dari orang yang baik sampe yang jahat semuanya ada di Seminari,tapi saya akui orang Waibalun menguasai segalanya di Seminari.Taa nekut bal te plein dari kiper sain penyerang ata Waibalun te aja.Taan badminton kia tite mehat yg pehen reket.Taan benisan /santo santa peen di noon hamu.

Waktu pertama rae marin goe hame teti hutun ne we, goe tobo pikiran kia tite ata Waibalun hau sekola te Seminari maksud naen kia temaka ilmu hae ka.Goe marin rae kame hau wi ku a maksud peen we tenaken.Nekun pukon naran Waibalun te Seminari bele aja jaha kae jadi naen tete naran Waibalun di noro baat kae.

Hae iker sain marin " ei jangan kita te berani me orang waibalun".Nekun goe marin jasa belen tenue oyan titen nolon yg maso te seminari sebenar naen rete naran Waibalun mae jaha .Sain kame yang maso pi gere di rae hormat ata Waibalun jaha.

Nekun goe pikiran nemuron koda piin wi ka" tite maso aja jaha nekun lodo di aja jaha"