Jumat, 21 Desember 2018
UE MALAR .... bolo waktu pesta Natal
Pali onok peten ue malar karna pesta Natal dahek wi. Nolon mama goen nekun naan bolo pake ue malar hena . Mama goen hope tepon bisa hala karna doi di noor hala jadi setiap pesta hari raya we kame lango ono nekun mekan bolo dari ue .
Minggu tou sebelum Natal mama goen udun goe bajo Ue sain dewa belusuk (kame lango ono ana belakin hamu jadi keian hama bajo tahan bajo ue ,maso tobo ape dapo ono we a baran biasa )
Bajo ue wahak di geki te kota ono di wejun ayak sain belusuk. Hari rabu mama goen lali pasar Oko hope tenasu .Tanggal 24 nokon misa balik mama goen tobo ator kelalamak polo bauk legulon penoko wati mor hogo nolo naan bolo .Bolo tradisi lango kame nekun rua saat natal .
Pertama naen bolo onde onde be rebos , nokon mor mama ne kame ana ana telok tobo polot tepon ue yang sampor ne wai pelatin .Polot belopor belopor hama tede ata jawa alant raan bakso bele naen di persisi hama ne .Jam lima legulon ape dape hemo kae.Keloton pe ape likat hutun kae .Mama rebos bolo onde onde wali sain tahak di hoe lodo di sampor ne tapo paron tali ne tenasu .Sama kemi dulat .
Kedua naen bolo onde onde be goreng ,Bolo piin hama hamu proses naen nekun naen bolo peen ono mama tao ne tenasu sampor ne tapo paron .
Misa balik sion pa ne mama limak di tobo buka serbe pe meja belen hutun .Tobo dahu nukut bolo piin
Watu peen goe nekun membayangkan bahwa TIDAK SEMUA keluarga te lewo kame raan bolo piin karna tite bisa hitung nekun tene hena yang mula ue di raan ue malar .Biasa naen ata rekan bolo jewada ka bolo tar .Nekun mama kamen ilmu naen nekun bisa naan bolo piin .
Bolo tou muri naran naen lengga dada .nekun piin taan pake ue menuren.Goe semangat loke paro ue ne paro tapo kalo urusan taan bolo lengga dada piin wi .paro ue wahak di tapel pe piring blek di maso te tasu ono yang ne wai pelatin bura mua . Tobo jaga bo menit telo di soga lodo di werehak ne tapo paron sampor ne tenasu polot golor .
pali wali kia goe balik keria hope ue di kaan bolo lengga dada muan .Kodi tutu ana ne kewae goen kalo piin bolo special mama goen naan soro kame waktu pesta Natal
Jumat, 29 Juni 2018
Rabu, 27 Juni 2018
https://www.youtube.com/watch?v=6Y8_4XHSVNQ
Jumat, 22 Desember 2017
NATAL NOLON RAE LANGO GOEN
Natal nolon rae lango goen
Minggu tou sebelum Natal mama mulai gete kae, No mama naan bolo a , mama naan Bolo Kesumbu e. Bolo piin sebenar naen gampa loke . Bajo ue malar sain belusuk di ayak nae di sampor ne wai , ne gula di polot raan limak epan rua di maso tasu ono.
Kantar Gloria te Gereja onon bain sama mae,balik pe laran di taan be dengung kewokor onon mor kantar misa Natal. Balik misa legulon sepat lau berobok oyan rae pasan paduk weken kaen getan .Sembayan berua di balik weli sion pa ne mama limak.Tobo menu teh hama hama te meja belen di pana maik sion nene nene rae limak.
Leron puna pana hode sion limak kaka arin weken kaen getan , tobo tuhu geka gerenga mae loke .Muan tou goe lali sion Nene kame Bae liman,nae soga liman di pehen eret goen , nae marin goe " irun moen wogat loke ..irun moen wi hama iru goen ..moe kia bura hama goe hae ".Goe peten nae loke karna matan naen tede bisa hala nekun nae naan onok goen sena loke .Meski matan naen tede hala nekun nae hukut kama weken kaen berdasarkan ra (suara) kame weken kaen .Nae bisa tobo pe kelmatan rekan ,Nene Bae nene Bala ...selamat Natal .....
Kalo nene goen mama Peni Betan Ne Nene Pa Todo Boli Tukan ...rae ruak piin wi hama di santo yosp ne santa maria .Teit ne rae ruak aturan nae jelas ..penoko wati hogo weli gereja leron getan , nokon jam 7 harus tobo te lango dore sembayan keluarga,Hari minggu hamu elan bole hala perinta Allah marin rayakanlah hari Tuhan tona benamo bole hala. Saat masa tua rae ruak morit hama hama ne goe .kalo nene pa nae tutu aja hala nekun takun te pa goen loke ,kalo nae hiin goe ka marin koda toun ruan ne goe maka nae perawi ekan marin pa moen e ,kia pa moe hiin goe we.Nene goen mama Peni alias peni kenipet haaaa peen ekan dilain gelupa ekan nawa naen pukon nolon suka rekan renun vitsin ajak wali jadi pengaru sain te kotok muri.Penoko wati jam 3 nae sogo goe hogo udun raik misa ,goe di tede jam hala hogo lap seka eret matak wahak di marin pana ruak maik gereja matak goe tonga gere tede te jam dinding heee ema goen santa eee manuk gokok dihala mor di haaa .Muan tou kame waok mekan hama hama di lewa jam tou nae hogo sogo goe ...Ena ...Ena eee nene mama alen malu jaha wi ....moe nein nene mama gan hala ...moe date loke di .....haaa goe hogo di toda nae rae meja di marin ni ..pi nene mama tede buka tudung saji ono wi wata noon mor ka take ,kalo take berarti tite tekan kae . haaa
Morit hama hama pi lango titen mae loke ..."kodi sambo muri ...SELAMAT NATAL 2017 ) peten hukut pa goen mama goen nene nene goen ..oyan goen weken kaen peti kelen lolon .......
Minggu tou sebelum Natal mama mulai gete kae, No mama naan bolo a , mama naan Bolo Kesumbu e. Bolo piin sebenar naen gampa loke . Bajo ue malar sain belusuk di ayak nae di sampor ne wai , ne gula di polot raan limak epan rua di maso tasu ono.
Kantar Gloria te Gereja onon bain sama mae,balik pe laran di taan be dengung kewokor onon mor kantar misa Natal. Balik misa legulon sepat lau berobok oyan rae pasan paduk weken kaen getan .Sembayan berua di balik weli sion pa ne mama limak.Tobo menu teh hama hama te meja belen di pana maik sion nene nene rae limak.
Leron puna pana hode sion limak kaka arin weken kaen getan , tobo tuhu geka gerenga mae loke .Muan tou goe lali sion Nene kame Bae liman,nae soga liman di pehen eret goen , nae marin goe " irun moen wogat loke ..irun moen wi hama iru goen ..moe kia bura hama goe hae ".Goe peten nae loke karna matan naen tede bisa hala nekun nae naan onok goen sena loke .Meski matan naen tede hala nekun nae hukut kama weken kaen berdasarkan ra (suara) kame weken kaen .Nae bisa tobo pe kelmatan rekan ,Nene Bae nene Bala ...selamat Natal .....
Kalo nene goen mama Peni Betan Ne Nene Pa Todo Boli Tukan ...rae ruak piin wi hama di santo yosp ne santa maria .Teit ne rae ruak aturan nae jelas ..penoko wati hogo weli gereja leron getan , nokon jam 7 harus tobo te lango dore sembayan keluarga,Hari minggu hamu elan bole hala perinta Allah marin rayakanlah hari Tuhan tona benamo bole hala. Saat masa tua rae ruak morit hama hama ne goe .kalo nene pa nae tutu aja hala nekun takun te pa goen loke ,kalo nae hiin goe ka marin koda toun ruan ne goe maka nae perawi ekan marin pa moen e ,kia pa moe hiin goe we.Nene goen mama Peni alias peni kenipet haaaa peen ekan dilain gelupa ekan nawa naen pukon nolon suka rekan renun vitsin ajak wali jadi pengaru sain te kotok muri.Penoko wati jam 3 nae sogo goe hogo udun raik misa ,goe di tede jam hala hogo lap seka eret matak wahak di marin pana ruak maik gereja matak goe tonga gere tede te jam dinding heee ema goen santa eee manuk gokok dihala mor di haaa .Muan tou kame waok mekan hama hama di lewa jam tou nae hogo sogo goe ...Ena ...Ena eee nene mama alen malu jaha wi ....moe nein nene mama gan hala ...moe date loke di .....haaa goe hogo di toda nae rae meja di marin ni ..pi nene mama tede buka tudung saji ono wi wata noon mor ka take ,kalo take berarti tite tekan kae . haaa
Morit hama hama pi lango titen mae loke ..."kodi sambo muri ...SELAMAT NATAL 2017 ) peten hukut pa goen mama goen nene nene goen ..oyan goen weken kaen peti kelen lolon .......
Langganan:
Postingan (Atom)