Goe lega suo te Facebook noon naan petutuk koda kenirin prae lewo hau,wekenkaen nuan piin petutuk lain koda "HEGE ATA HENA ROON NARAN GANTI BUPATI HUUN".Goe tobo geka alek sain gelerek.Koda petutu pelerek pelerek hama rae ata benisan alant hamu we.Ekan dimarin a we ka.Koda heke weken kaen te ata benisan alant hamu.Goe marin te onok "uok uman kenapunt hamu".Rae marin koda raen maen hamu,onok atek raen maen hamu.Pek ke di rae gete muri,hege ata yang temae yang bisa dein naan jadi bupati.
Koda kenirin weken kaen maen hamu,nekun mio tede ne peten rae tenuen nolon ka rae yang teik rae ile kolan.Morit raen sederhana jaha,rekan renun ketuun hala,logek lipa senai pe wekik hena,lango dein di leder ,renu wai di noro pe.Morit raen hama ne kewe nekun roi nokon legulon leron hena.Rae proin prokot aja hala.Rae nekun marin a naan lera piin pelate putuk jaha,anaan uran sain hala.Rae pikiran hala hege ata naran bupati,camat tao rae di gete hala bupati raen kerian a hena kae.Morit raen pana dore Dewa Lera Hulan.Koda raen nekun tou !" piin tenekan ka piin elen"Rae pikiran aja hala hege ata jadi bupati.
Rae tobo berkumpule te waterleden raan tuhu geka wekik.Marin wekik raan maen hamu.Koda raan elent tenaken.Weken kaen maen hamun.Nekun pi wi ana raen raik sekola raan jadi ata belen hamu kae.Balik lewo raan petutuk ne bahasa logat gehan kae.Rae mulai suk ladak lewo tana.Piin elen,piin mesi ni wi,goe main mio mesin dore .Pe weli nai we,koda ata benisan alant wali ku a,naan ata lewo tana bisa te pereto berua ka a.Pek meten lela nae naan wekin naen meten benisan,dore bulet babak wekin te patai politik,loge ne dasi jadi nae ata belen tali ne pangka ata benisan.Goe sekola lau tana jawa,goe piin bisa kaan lewo tana tali mae muri,koda goen elent tenake,mio pile goe,goe kaan mio meten mae muri.
Goe marin mio weken kaen ata benisan alan we" Mio gen wata ata lewo tana raen,mio menun wai ata lewo tana raen,mio gen doi ata lewo tana raen,pek kedi mio marin mio piin ata benisan alant kae?...uon uman nala kenapunt,mio maan a kae soron lewo tana.mio piin bego helut dore hulan hala ne.Maka mio peten ata lewo tana ne kalo mio te kerosi hutun kae,peten saja mio pikiran ketun hala mo,maka mio tula laran nein lewo tana.Mio piin benisan alant hamu jadi mio maan a weken kaen dore koda mion.
Goe kia kodi tobo sembayang hena ka,polo ata benisan alant rete pana laran raan maen hamu ka.Goe di herank berua,teman goen genato te facebook goen marin dukung ana ine piin wi,sain pali wali goe tapan koda kenirin tou dihala.Mio piin hege ata tou ne bisa ganggu gugat pikiran goe taan tuhu tenulak naran naen.Eeee...goe heron nae (calon bupati) palin wali te toko mitra 10 onen,nae hope keramik kia naan langon naen sebole,kia nae pelala pelea ne goe ne,tenaken.Pukon nae kena goe hala ku a jadi nae majan goe hala.
Nekun noro susa jaha nemuron pile ata kediken titen raan jadi bupati ka camat ka.Tite piin toir kae ka,rae tobo teti hutun kae,rae reso uok kae,tite biin belema selepot wahak.....rae piuk tite sain sisan kuhan di tenake,mei titen rae renun isek raan wahak.Rae raan jadi bupati we rae teik prae lewo nekun rae heke kae langsung helut,pinda teik te Jakarta,Jawa,Bali,morit raan sena wekik rete ne doi titen nimun prae lewo hau.Ekan bekel mio ata benisan alant hamu e...goe marin koda tou piin..."ekan di gute pirin lamak ata lewo tana raen,moe maan rae meten benisan di a hala nekun moe hukut ne lewo tana....lewo tana dore mei moen sain kepo,kalo moe maan mete laran elen
Rabu, 03 Februari 2010
Minggu, 24 Januari 2010
Sambung 02 / Cerpen : Oa Lena Kebarek maen tou
Rae ruak pana wegit raan beran hamu,hala ku a biasa nae guru raen dein pe pendopo sekolah erent,naan tobo gelinge geliar hege ata yang sain palin urin."He he he..Lena ..pai pia menghada goe pia! "gupk pa guru Paul dein lipat liman meten kebeler lena." ai hele,mata goe pali wali,Pak paul epet goe..."Lena meten te onon dug dag sama sekali."A naan moe sain pali wali telat jaha...tema moe weke kaen maka neku kae moe beten bego ....tede pia ...goe tutu ne moe wi.! pa Paul meten kerabit hala ku a,nae noir kae kalo soban naen lewa nolo kae pek ke di peken Lena urin."moe tede hege!" taka pa guru,goe minta ampo!."minta ampo a..leron matan getang sain paling kola,peten tenuen moen hala wi.Rae genato moe pai sekola ti nekun mae opon akal rae.".Pa guru hiin nae nemuron sama sekali.Koton naen benani hala tonga tede gere."pali wali goe nein ampo te moe,nekun moe maan ulange muri,moe modi moi ,goe kaan a ne moe,moe bain i Lena,pana rae maso kelas onen ,ekan sain telat muri!" "terima kasih aja jaha pak guru.""heenn ...kae we ,pana kelea ..! Pak guru Paul kerabit ne Lena pukon nae Lena ne pak guru Paul rae mei tou mor.Pa guru Paul aden ne anan naen we Lena.Jadi nae kia gehi jaha kalo ana onon naen ait masala te sekola.
Lena plae naan beran hamu maso kelas onon.Matan naen berani hala tede ulin te kola naen.Pukon naen pekola naen we soban naen tobo."moe a hala hi...Pa guru Polu wereken ne moe...."gete soban naen dore kola pai naan be biseke ."A ka ..ekan ganggu goe...tobo meren kia ...!.lena tapan soban naen hama noro kerabit berua soal naen soban naen pile laran te dahe dari pada nae.........Bersambung.....
Lena plae naan beran hamu maso kelas onon.Matan naen berani hala tede ulin te kola naen.Pukon naen pekola naen we soban naen tobo."moe a hala hi...Pa guru Polu wereken ne moe...."gete soban naen dore kola pai naan be biseke ."A ka ..ekan ganggu goe...tobo meren kia ...!.lena tapan soban naen hama noro kerabit berua soal naen soban naen pile laran te dahe dari pada nae.........Bersambung.....
Jumat, 22 Januari 2010
Waibalun ne Seminari
Leron pertama goe ramak leik te Seminari Hokeng,bapa tuan tou gete goe ni"Maaf anak aslinya dari mana?" "Dari waibalun Pater!""O Waiablun ka...banyak yang masuk banyak juga yang keluar"Naran Paroki Waibalun te Seminari Hokeng we bele sama sekali,mungkin tite taan regestrasi ex seminari waibalun.Rae marin Waibalun penguasa te Sesado.Goe marin kia nemuron.Tite Waibalun nekun paroki kenen tou,ata raen iker hama Paroki Larantuka,Solor,Adonara,Maumere,Ende.Tite gehit gabon ne Jawa alant hala.taan tete wekit mehat.Pak Guru Servas marin goe ni "Kalian orang Waibalun dari orang yang baik sampe yang jahat semuanya ada di Seminari,tapi saya akui orang Waibalun menguasai segalanya di Seminari.Taa nekut bal te plein dari kiper sain penyerang ata Waibalun te aja.Taan badminton kia tite mehat yg pehen reket.Taan benisan /santo santa peen di noon hamu.
Waktu pertama rae marin goe hame teti hutun ne we, goe tobo pikiran kia tite ata Waibalun hau sekola te Seminari maksud naen kia temaka ilmu hae ka.Goe marin rae kame hau wi ku a maksud peen we tenaken.Nekun pukon naran Waibalun te Seminari bele aja jaha kae jadi naen tete naran Waibalun di noro baat kae.
Hae iker sain marin " ei jangan kita te berani me orang waibalun".Nekun goe marin jasa belen tenue oyan titen nolon yg maso te seminari sebenar naen rete naran Waibalun mae jaha .Sain kame yang maso pi gere di rae hormat ata Waibalun jaha.
Nekun goe pikiran nemuron koda piin wi ka" tite maso aja jaha nekun lodo di aja jaha"
Waktu pertama rae marin goe hame teti hutun ne we, goe tobo pikiran kia tite ata Waibalun hau sekola te Seminari maksud naen kia temaka ilmu hae ka.Goe marin rae kame hau wi ku a maksud peen we tenaken.Nekun pukon naran Waibalun te Seminari bele aja jaha kae jadi naen tete naran Waibalun di noro baat kae.
Hae iker sain marin " ei jangan kita te berani me orang waibalun".Nekun goe marin jasa belen tenue oyan titen nolon yg maso te seminari sebenar naen rete naran Waibalun mae jaha .Sain kame yang maso pi gere di rae hormat ata Waibalun jaha.
Nekun goe pikiran nemuron koda piin wi ka" tite maso aja jaha nekun lodo di aja jaha"
Jumat, 15 Januari 2010
CERPEN : Oa Lena Kebarek maen tou
Penoko wati tonga tede jam nurun nemun kae,Baba beten turu hogo.Lipa warna serebint loa te kenatan hutun langsung pelae kamar mandi onen.Hebo siren gelohuk naan kelean hamu.Gute deko labu seragam te kelmatan kolan ,loge naan beran hamun."no Baba e,gon huro wata bua hala !"guok maman naen meten dein te kelmatan dapo haanke."kae we mama,goe kelea berant wi"tapan Baba meten gute tas sekolah ,pelae naan beran hamu. Ema Bunga tede naan be herant sama sekali,leron onen wi ka nae gehi gaan penoko wati hala.Biasa naen menit telo di nae ekuk nane wata.
Doen mor ata ana berkewain tou,ratan loun belahan loke dein jaka pe tobi belen pukon meten guok " Hoe..hoe.....Baba ...Baba...goe pia,kelea berua!!!!!!""Moe jaga maka neku kae wi...ekan bekel e,goe turuk hogo telat di.."Baba marin meten heuk dag ."Ei moe..goe bole jaga gelek ti wi moe peli turonk hege ata ka sain gelupa hogo hala"tapan Oa Lena."Ekan marin ne ka Oa ..moe moi goe ni nekun neku nokon goe turonk moe ka "tapan Baba meten tede kelipi Oa Lena ."Moe dein nera ...ekan wejun waja..dein di nera te ke we....plok ..plok plok....."Baba gute kajo au terie keteke meten rogo rega pe dahe ne Oa Lena koton gere."Ei Baba e..paon paon dimaen ka,nekun keteke hena di moe terie sain hepa bela wahak."A wi iii...weken kaen goe kaan pukon moe ka,goe jaga moe hala ne "sambo Baba tali koda polo naan Oa Lena gelerek aten onen."Moe..peneko wati di moe rayu goe kae..."tapan Oa Lena meten pehen Baba liman."Ai Oa e...goe mata morit kete hukut naran moen,ekan gelupa pali wali goe marin moe,goe suka moe sain dunia lewat wahak nain."Oa Lena meten tali onen berea meten gelinge te kala naen haek ata iker bain ka tede rae ruak raan be sobak penoko wati mo.
Genta rae sekala SMP alan kae."Oa lena kae we e...moe mala laran pi rae wi, goe kala laran papan wainke" Rae ruak bagi wekan laran masing masing pukon naen aturan rae sekola raan be soba bisa hala ....................................Bersambung.........
Doen mor ata ana berkewain tou,ratan loun belahan loke dein jaka pe tobi belen pukon meten guok " Hoe..hoe.....Baba ...Baba...goe pia,kelea berua!!!!!!""Moe jaga maka neku kae wi...ekan bekel e,goe turuk hogo telat di.."Baba marin meten heuk dag ."Ei moe..goe bole jaga gelek ti wi moe peli turonk hege ata ka sain gelupa hogo hala"tapan Oa Lena."Ekan marin ne ka Oa ..moe moi goe ni nekun neku nokon goe turonk moe ka "tapan Baba meten tede kelipi Oa Lena ."Moe dein nera ...ekan wejun waja..dein di nera te ke we....plok ..plok plok....."Baba gute kajo au terie keteke meten rogo rega pe dahe ne Oa Lena koton gere."Ei Baba e..paon paon dimaen ka,nekun keteke hena di moe terie sain hepa bela wahak."A wi iii...weken kaen goe kaan pukon moe ka,goe jaga moe hala ne "sambo Baba tali koda polo naan Oa Lena gelerek aten onen."Moe..peneko wati di moe rayu goe kae..."tapan Oa Lena meten pehen Baba liman."Ai Oa e...goe mata morit kete hukut naran moen,ekan gelupa pali wali goe marin moe,goe suka moe sain dunia lewat wahak nain."Oa Lena meten tali onen berea meten gelinge te kala naen haek ata iker bain ka tede rae ruak raan be sobak penoko wati mo.
Genta rae sekala SMP alan kae."Oa lena kae we e...moe mala laran pi rae wi, goe kala laran papan wainke" Rae ruak bagi wekan laran masing masing pukon naen aturan rae sekola raan be soba bisa hala ....................................Bersambung.........
Minggu, 03 Januari 2010
Leron hulan pana kelea
Letut matat nekun berua hena ,kedoko hogo leron ganti kae,hulan sain tuun ganti nawa hamun kae.Tite bain hama tite piin ata keren kelotek mor nekun umur titen pana kelea sama sekali.Piin bain hama turont hala kae,piin nemuron sama sekali,pali wali tuun ribu rua ne pulo kae.Hege ata sangka tuun ribu ratu hiwa ne pat goe pana meranto.Tege lege,nukut nakat leit limat,pana berajank pia ata lewo tana.Pana tait doan doan pukon seba ganti nasib.Kalo tite nekun tobo tekan tenun turut hena te ata lewo tana peen kia nawa temae,elen naen bele loke.goe tula koda tou ni wi "pali goe gere motor bisa kae,nekun ata iker pali wali rae di bisa gere oto kae,pali wali goe gere oto rae iker bisa gere pesawat kae".Goe pikiran kalo tite tematan hala maka tite nawa tekola terus,nekun tonga tede hena.Nekun koda goen piin bukan raan seba awaat taan aja nekun maksud naen" ekan sombo te ata lewo tana" Leron pali wali goen nekun marin onet rae ata kuasan kae,ekan di telen ilu,peen ata raen,pek kedi kalo moen noon kae moe mesen tonga tede ata iker lebe kuasan dari moe.....pana tede teti hutun ne lali leren.Ekan maan dore suka onem moen meha di bole hala.tite morit ne ata kediken aja jaha.....ato koda basahan goen tou piin wi " inem anem tenaken ekan di ginge gerisek sain ata lewo tana bain moe ni wi....pana lere lere...hukut laran inam anam moen....
Koda kenirin goen piin tuun huun piin....
Atek onek gelete uran warat
koda majan jaga liko lein liman
Goe turuk tonga teti wolo lolon
goe majan marin naran liman matan getan
pe lali keneka wowol onen
goe lipat tao koda wai buran
Jaga goe liko goe ata ema inem nona
Likat luran naman wai bao lelen
Koda sare waret goka hode kame
doran kame nawa punan,maan mete toda kame
gera bego pi laran wai angat pukon
Laran kamen nimun ata raam be liko padak
Moe jaga kame ne naran kamen
sudi kudi jaga kame...ata suku,lewo punan
hupon gabon kame pe leit wolor lolon
pi koda piin kame jaga maan be lenggor
Moe pi likat naran kamen
Ata lewo kame
jaga kame pali wali ne leren iker matan getan...........
Koda kenirin goen piin tuun huun piin....
Atek onek gelete uran warat
koda majan jaga liko lein liman
Goe turuk tonga teti wolo lolon
goe majan marin naran liman matan getan
pe lali keneka wowol onen
goe lipat tao koda wai buran
Jaga goe liko goe ata ema inem nona
Likat luran naman wai bao lelen
Koda sare waret goka hode kame
doran kame nawa punan,maan mete toda kame
gera bego pi laran wai angat pukon
Laran kamen nimun ata raam be liko padak
Moe jaga kame ne naran kamen
sudi kudi jaga kame...ata suku,lewo punan
hupon gabon kame pe leit wolor lolon
pi koda piin kame jaga maan be lenggor
Moe pi likat naran kamen
Ata lewo kame
jaga kame pali wali ne leren iker matan getan...........
Jumat, 11 Desember 2009
Mengenang Nene No Bernardus Bala Marang
Sekian banyak bangunan gereja tua terpatri oleh tangan sang tukang Bala "Robu "Marang,begitulah cerita ibuku sambil mengenag ayahnya .Kala beliau menjadi salah seorang tetua di waibalun yang sangat beriwibawa.Seperti kata bapak Karel Balun." Hai No e...ekan di marin elen mete naran nene mio naran,naran naen peen bele jaha"Tapi sosoknya menjadi hilang begitu saja karena beliau meniggal di Serinuho.Temat yang sangat jauh bahkan saya pun belum pernah menyentuh tanah ini.
Kenangan atas nama nya begitu terasa ketika masih di bangku Seminari Hokeng yang kebetulan melakukan tourne ke desa Belogili.Saya menginap di sebuah keluarga yang sangat sederhana.Pada malam pertama saya menperkenalkan diri dengan nama lengkapku " Bernardus Bala Tukan"Dari wajah kepala keluarga tersebut terpampang sebuah guratan pertanyaan seakan dia mengenal dengan baik nama ini,namun hanya beda pada sukunya saja.Sambil memegang gelas kopi hitam pekat pria berambut uban itu bertanya kepadaku..."No moe moir ka take no naran Bernardus Bala Maran,tukang ata Waibalun"Hati ku tersentuh mendengarkan nama kakek ku disebut di Belogili.sambil menarik nafas panjang dengan sebatang rokok Bentoel biru ditangan ku coba memadamkannya dan perlahan kuungkapkan bahwa saya adalah cucunya .Diapun langsung merangkul tubuhku sambil berkata " no ...nene mion peen we ata kediken mae jaha ,nae ne aten nae buran jaha.
Lalu aku berkata dalam hati ku." Tuhan apakah yang aku cari....ternyata kakek ku telah memberikan namanya untuk dikenang orang dalam kebaikannya.
Di Bama menjadi tepat yang sangat special buat kakek ku karena sempat beliau membangun rumah untuk nya dan Gereja Bama menjadi hasil karyanya pada masa itu.Dengan seokor kuda nya yang pintar senantiasa menemaninya kemanapun beliau mengabdi.
Ketika di Seminari pada awal tahun ajaran ,terpampang sebuah nama di papan pengumuman kelulusan dengan nama Bernardus Bala Marang.Saya pun mendekatinya dan berkata"Siapa yang kasih namamu itu"jawabnya "ibuku ...bapak ku ada di Malaysia dan dulu ada seorang kakek yang selalu membantu keluarga kami jadi untuk mengenagnya ibuku memberikan nama ini untuk ku.Saya pun tercengang dan berkata..."teman nama bernardus bala marang ,hanya ada atu dan itu adalah kakek ku.
Seminggu yang lalu au menelpon ibu di kampung dan dia bercerita bahwa tanggal 12 Desember 2009 ini ,semua keluarga Marang akan melakukan upacara adat untuk memindahkan makam kakek ku dari Serinuho ke Waibalun.......aku pun merasa senang sekali.Semuga tahun depan saya bisa pulang kampung ke Waibalun agar bisa berziarah ke makam nya.Terkadang dalam doa aku selalu menyebut namanya..." Walau engakau tidak pernah melihat saya dan sebaliknya saya yang satu satunya cucu yang belum pernah berziarah kemakamnya selalu merasa begitu dekat.
Tuhan ku walau aku tak pernah melihat nya namun dia telah membirikan kebesaran namanya untukku..." nene no Bala ..moe teti kelen onon...tonga tede lodo goe pia ata lewo tana...peten goe jaga goe polo ata kediken maen halan ekan nalan ne goe.......
Sekian banyak bangunan gereja tua terpatri oleh tangan sang tukang Bala "Robu "Marang,begitulah cerita ibuku sambil mengenag ayahnya .Kala beliau menjadi salah seorang tetua di waibalun yang sangat beriwibawa.Seperti kata bapak Karel Balun." Hai No e...ekan di marin elen mete naran nene mio naran,naran naen peen bele jaha"Tapi sosoknya menjadi hilang begitu saja karena beliau meniggal di Serinuho.Temat yang sangat jauh bahkan saya pun belum pernah menyentuh tanah ini.
Kenangan atas nama nya begitu terasa ketika masih di bangku Seminari Hokeng yang kebetulan melakukan tourne ke desa Belogili.Saya menginap di sebuah keluarga yang sangat sederhana.Pada malam pertama saya menperkenalkan diri dengan nama lengkapku " Bernardus Bala Tukan"Dari wajah kepala keluarga tersebut terpampang sebuah guratan pertanyaan seakan dia mengenal dengan baik nama ini,namun hanya beda pada sukunya saja.Sambil memegang gelas kopi hitam pekat pria berambut uban itu bertanya kepadaku..."No moe moir ka take no naran Bernardus Bala Maran,tukang ata Waibalun"Hati ku tersentuh mendengarkan nama kakek ku disebut di Belogili.sambil menarik nafas panjang dengan sebatang rokok Bentoel biru ditangan ku coba memadamkannya dan perlahan kuungkapkan bahwa saya adalah cucunya .Diapun langsung merangkul tubuhku sambil berkata " no ...nene mion peen we ata kediken mae jaha ,nae ne aten nae buran jaha.
Lalu aku berkata dalam hati ku." Tuhan apakah yang aku cari....ternyata kakek ku telah memberikan namanya untuk dikenang orang dalam kebaikannya.
Di Bama menjadi tepat yang sangat special buat kakek ku karena sempat beliau membangun rumah untuk nya dan Gereja Bama menjadi hasil karyanya pada masa itu.Dengan seokor kuda nya yang pintar senantiasa menemaninya kemanapun beliau mengabdi.
Ketika di Seminari pada awal tahun ajaran ,terpampang sebuah nama di papan pengumuman kelulusan dengan nama Bernardus Bala Marang.Saya pun mendekatinya dan berkata"Siapa yang kasih namamu itu"jawabnya "ibuku ...bapak ku ada di Malaysia dan dulu ada seorang kakek yang selalu membantu keluarga kami jadi untuk mengenagnya ibuku memberikan nama ini untuk ku.Saya pun tercengang dan berkata..."teman nama bernardus bala marang ,hanya ada atu dan itu adalah kakek ku.
Seminggu yang lalu au menelpon ibu di kampung dan dia bercerita bahwa tanggal 12 Desember 2009 ini ,semua keluarga Marang akan melakukan upacara adat untuk memindahkan makam kakek ku dari Serinuho ke Waibalun.......aku pun merasa senang sekali.Semuga tahun depan saya bisa pulang kampung ke Waibalun agar bisa berziarah ke makam nya.Terkadang dalam doa aku selalu menyebut namanya..." Walau engakau tidak pernah melihat saya dan sebaliknya saya yang satu satunya cucu yang belum pernah berziarah kemakamnya selalu merasa begitu dekat.
Tuhan ku walau aku tak pernah melihat nya namun dia telah membirikan kebesaran namanya untukku..." nene no Bala ..moe teti kelen onon...tonga tede lodo goe pia ata lewo tana...peten goe jaga goe polo ata kediken maen halan ekan nalan ne goe.......
Minggu, 06 Desember 2009
1 Hari pertama VS 5 Abad
Persisa teti Jawan tuun wainke gentan abad 5.Laran belahan sama sekali kae.Tuun rate lema were ria.Atak kediken meten aja roir persisan peen.Weken kaen onok dore jaha.Weken kaen onok roir tede peristiwa piin wi.Goe kalo waktu goen noon kia dore rae.Nolon kenen mor dore persisan piin mae jaha.Tede Tuan Ma,kewenger kantar ovos,tede Lakademu.Lerin lali Waibalun haka di bain gelek hala.Balik sain te lango jam telo lungulon di bain gelek hala.Persisan peen naan onot bain sama di gelete.
Pali wali goe tobo gete wekik goen.....1 hari pertama VS 5 abad makna naen nenggelain wi.Tenuen oyan nolon raan pana persisan ne maksud naen kia mae jaha.Sain tite ana cucu pi urin di dore jaha.Goe pikiran kia tenuen nolon we rae "butuh sebuah kekuatan secara rohani untuk menemani hidup mereka"rae raan piin polo rae pana pehen ne koda kenirin Tuan Ma naen.Rae raan piin mae jaha ,jaga di jaha,tardisi weken kaen piin mae pehen mae jaha.."Pasti kesan pertama waktu rae raan persisan piin pasti mampu mengubah hidupnya/memperbaharui hidupnya selama setahun kedepan dan seterusnya .".
Tite pi urin tawa gere kia neggenai wi.Ata kediken wekaen raan rodi marin jaman berubah kae,tradisi juga aja jaha kae yang berubah.Nekun tite marin perae lewo tana "urusan Tuan Allah /Tuan Ma tite kelea jaha.Weken kaen lodo dore heti sembayang dari rabu terewa,kamis putih ,jumad agung,sabtu santo,minggu paskah.Weken kae lout sembayang nawa menun .weken kaen sain ne maksud nae noon hamu.
Tradisi persisan piin mae jaha nekun:
1.tite a naan berubah hala sama sekali.Berubah nekun pe nokon sembayan persisan meha hae di toi hala.Tait heti sembayang pe ke di balik hau minggu paskah we nawa di taja lajak.kehukon renun arak tenuen sain ana keren kelotek di renun sama sekali.
2.Ata kediken kemiir alant meten aja.Rae ne lango,oto,motor labu huun hamu nekun raik misa nekun rete ratu lema hena raan nein derma.
3.Gereja menun nekun hari paskah hena.Nekun mimggu biasa ekan tene tou.Hari raya rae raan kantar maen hamu nekun hari minggu biasa nae kantar sama belema selot.
4.Waktu tite morit more benci wekik sama sekali nekun pas rae mata tani mahin nemuron hamu.A naan mio gehik maan maen hamu hala jaga ata mata kia baru tani mahin.
Persisan peen mae jaha.Lewo punan dore sembayang nekun goe pikiran pi nokon piin wi......" Tenuen nolon waktu rae raan persisan piin maksud nae mae jaha jadi sain pali wali tite taan mor.Nekun pali wali sain abad 5 kae,eret matat tite meten mae ka meten date di tede susa jaha kae.Abad 5 kae mesti naen tite piin morit ne Tuan Allah we mae jaha" Tite hama ne ORANG KUDUS alant kae ka..........Jaga persisan peen mae siu nekun jaga ne wekik siu....Jiwa ne wekik titen tou...sembayang aja jaha nekun taan berdosa di aja jaha we di elent aja jaha hamu we.
Malam bae...
Pali wali goe tobo gete wekik goen.....1 hari pertama VS 5 abad makna naen nenggelain wi.Tenuen oyan nolon raan pana persisan ne maksud naen kia mae jaha.Sain tite ana cucu pi urin di dore jaha.Goe pikiran kia tenuen nolon we rae "butuh sebuah kekuatan secara rohani untuk menemani hidup mereka"rae raan piin polo rae pana pehen ne koda kenirin Tuan Ma naen.Rae raan piin mae jaha ,jaga di jaha,tardisi weken kaen piin mae pehen mae jaha.."Pasti kesan pertama waktu rae raan persisan piin pasti mampu mengubah hidupnya/memperbaharui hidupnya selama setahun kedepan dan seterusnya .".
Tite pi urin tawa gere kia neggenai wi.Ata kediken wekaen raan rodi marin jaman berubah kae,tradisi juga aja jaha kae yang berubah.Nekun tite marin perae lewo tana "urusan Tuan Allah /Tuan Ma tite kelea jaha.Weken kaen lodo dore heti sembayang dari rabu terewa,kamis putih ,jumad agung,sabtu santo,minggu paskah.Weken kae lout sembayang nawa menun .weken kaen sain ne maksud nae noon hamu.
Tradisi persisan piin mae jaha nekun:
1.tite a naan berubah hala sama sekali.Berubah nekun pe nokon sembayan persisan meha hae di toi hala.Tait heti sembayang pe ke di balik hau minggu paskah we nawa di taja lajak.kehukon renun arak tenuen sain ana keren kelotek di renun sama sekali.
2.Ata kediken kemiir alant meten aja.Rae ne lango,oto,motor labu huun hamu nekun raik misa nekun rete ratu lema hena raan nein derma.
3.Gereja menun nekun hari paskah hena.Nekun mimggu biasa ekan tene tou.Hari raya rae raan kantar maen hamu nekun hari minggu biasa nae kantar sama belema selot.
4.Waktu tite morit more benci wekik sama sekali nekun pas rae mata tani mahin nemuron hamu.A naan mio gehik maan maen hamu hala jaga ata mata kia baru tani mahin.
Persisan peen mae jaha.Lewo punan dore sembayang nekun goe pikiran pi nokon piin wi......" Tenuen nolon waktu rae raan persisan piin maksud nae mae jaha jadi sain pali wali tite taan mor.Nekun pali wali sain abad 5 kae,eret matat tite meten mae ka meten date di tede susa jaha kae.Abad 5 kae mesti naen tite piin morit ne Tuan Allah we mae jaha" Tite hama ne ORANG KUDUS alant kae ka..........Jaga persisan peen mae siu nekun jaga ne wekik siu....Jiwa ne wekik titen tou...sembayang aja jaha nekun taan berdosa di aja jaha we di elent aja jaha hamu we.
Malam bae...
Langganan:
Postingan (Atom)