Nolon kenen pe lango kamen

Lera weli noro eka mite kae,pa goen dein guok nemuron hamu pe tangga lango erent we,"balik dai gelohuk hala ne ,lega moen piin wi pake hala loke wi..bera dai ooo..." rebaon matan getan naan be guok goe hamu.majan mua honik hala maka mete teneger.Balik dai di selomak wekik di noro dike dan berua ,rosuk wekik di lou ,peen wahak tobo gurun manuk maso kanda ono.pe nigun teti di wawe kanda maka telo rawa gek me nemuron hamu.bain gelek kae maka taan be guok "nanga maka a hena ne wawe..goe regok moe ne moir kia ue 'Weli lawat belimbe huan ka lepo paja lolon di walas pe kanda onon nai we.

Longo erent ne kedosor ...oyan kamen Luga Bethan kia pikiran kae sebole polo ana cucun naen ekan lega raan nekuk bolak ata nihak sebole ssain ne kedosor di nae naan pe tangga lango erent we.nekun kedosor piin wi ekan mege bain lodo gere deko kia rabo rait wahak.

Lango erent di elan noro belen belehan mur maka leron matan getan weken kaen sain raan nekuk te elan kame peen di.Singet terie heti lali maso ta lango umak ono terus.Taan bal di sama sekali peen we..kaka tana Kedang, Yako kedang,Luis Balun,kaka Luis Betan,Yose kerans ,kalis Dole,tali ne kaka stanis ata Adonara bbak bulet wekik tekun heti dai nemuron hamu.Nuan a weken kaen matan getan di pe elan peen we di.

tapo pukon pira puhik golek lango kamen rekan ,nokon matan getan hae goe suka gelinge ata kediken hae gere gepu tapo menurun heti hutun haaaa goe geka muan hala ku ,rae gepu gekat bela di goe lau loron di marin goe repo pa goen haaa rae di tobo sama meren .Goe gute tapo di huro kan mehak ka haaaaaa.

Lango kamen piin nolon  ne sejarah naen noon,nene kame Luga Bethan genan soron anan nae Peni Bethan nekun sajan nae ka ,rae ana belakin tenaken , suku tobo marin wekik ka, nekun oyan kamen Luga bethan peen bijaksana loke.nae marin ni " ana goen belakin tenaken nekun leron getan ana goen berkewain tobo gelekat goe jadi lango ne elan weken kaen goe soron ana goen ,nekun kalo ana goen tenaken pe ke di goe pau ata bala welin alan anak maka baran kenena goen weken kaen goe soron nae..peen pukon nae yang jaga goe,tobo dapet goe,nae yg tede goe.

Lango kamen piin goe paken hege maso naan ne nalan noon maka selamat hala nae peen we.Goe kene mor bain wekik denge loke rasa hama bo oyan kame pele liko loke lango kamen peen we.Ata langok nolon sen wati mor nekun oyan kame noon kae.Goe kene SD kelas enam doi benggol belanda sama tenepan .Mok belen rua nawa menun ketekel pe lemari belen hutun.

Koda basan pa goen Deminggu marin kame anak telo ni " Inek anek tenaken maka ekan di bengank pe woho we..ata roir titen piin anet tenaken " .

Nekun kame bele gere weken kaen pana meranto..peken lango perae ekan amu...mama kamen ne oyan kamen weken kaen kia tobo jaga elan ekan lango kamen piin wi......Tuan Allah eeee terima kase aja loke masa kenen kame peen mae loke...

SO HABIS PERMESA By Bernard tukan / Paskah di Nagi 06.04.2012

Nena aja hala

Tuan Allah ee terima kase aja loke Moe soron goe Ulang Tahun pas ne hari Raya Nyepi, Jumad Pra Paskah / puasa onon ,leron punan kaan merenk hamu nekun tobo,marin te atek goen onon..."Tuan Allah ee terima kase aja loke pali wali Mama goen teti kelen onon kia sembayan soron goe..hukut goe ulang tahun..terima kasih loke mama goen ..terima kase aja loke mama goen sayange  "

Lero mete aja loke kae,umur goen di meten tali aja...pikiran nekun tou..tobo sayang ana goen kewae goen,pa mama goen,kaka arin goen ,tema tema goen, Tobo mete goren kentang goe hukut peten mama goen loke...nolon ulang tahun ,nae gete goe " moe onom mama naan a soron moe " goe marin nae ni " moe we nekun bisa maan ue nomi ne bolo kesumbu ..moe maan bolo tar bisa ? ..take oo..,ekan digete ..maan bolo kesumbu bera ..goe jaga ...".Nekun pali wali goe nekun tobo hukut nae ne tenaro padu tou tobo sembayan .

Penoko wati loke ana goen tobo tion goe hope a mainan ...nekun leron pali wali Nyepi..ta lodo talaga opon akal nae berua di tobo geut kolan naen berua,tobo tutu koda .haa nae onon sama berea..tutu koda kolon pohon muri nekun noro semuremut ..kolon pohon wi basa indonesi naen a di koi hala muri..nekun nae geka loke.Goe marin nae ni ka..kolon pohon we nekun rae lewo hena,bauk ere rua moe bele gere kia modi moi kolon pohon erent we hama ne hege ata tou .

No Billie ne Oa Clarita eeee bera bele gere gelekat pa ne ema mion,ekan gelupa ne koda kenirin lewo Waibalun wi....

Ana ata Waibalun

Ana  bele gere nete naran suku ,Oyan nolon marin ekan gelupa tao naran ana we ne naran suku pe kola we, peen we mesen ne kaen ,ekan tula tali tagal modin maan. Naran nolon we toir kaen piin wi hege ata tou cucun,hege tou suku naen. Nekun goe tobo gete wekik wi, ana kamen bele sain tua leren pia ata lewo tana lega rekun ne suku naran kia rae ait a tou ka .Umpana naen nae ana belakin jadi belake bauk ere rua hak naen gewete prae lewo nekun prae lewo hukut ne naran naen mor..Peen kia genai we, ( piin wi hama umpama naen wi ata ana meranto alant gete posisi raen te suku onon genai )

Nekun goe tobo marin onok, ana goen mesen noir ne Waibalun,mae date nae di mesen noir ne lewo tana goen,tana nene oyan naen.Goe mesen marin nae kalo goe bangga loke jadi ana Waibalun,nekun goe kia tutu marin nae tentang yg maen maen hamu,daten berusan goe marin hala,...heee nekun hege ata noi we bauk ere rua nae bene nai naan jadi tuan paji ka a ka todi toi ....wooooooo ana keren kelotek prae lewo tana eeee..nene oyan mion nolon we aja loke dore sekola raan jadi tuan paji...genai mio dore ka take.....ekan tobe menun isek kebako,maan ido ka a berusan iker...nekun tou ...ana ata Waibalun.....

Morit piin eee

Tapo lolon wejun wajan ...pao pukon sain leder ..angin uran terisi nemuron hamu,leron punan di uran piin wi.Tait pana laran kedemel hamu.Ekepake sama aja loke peli leren pe tale ganto ..pali nokon goe tobo pikiran berua " ata marin cinta pertama gelupa hala ..peen nemuron ka take ?" nekun goe baca kitab suci onon wi ka " A yang Tuan Allah puin kae pi tana ekan wi ekan laha gelahuk,Nae tulis te buku belen onon kae ne naran titen "
Oooo todi dore hena ka .pana belelent heti lali rae lau taan maen hamu.Ekan di ekan maan naran nimok sain bemilan,tula naran sain kolak dihugu wahak kae di taan ne nalan nekin wanan muri polo a ne peen we.Hama bapa Uka marin "ekan ekan dijangan jangan ...!!" haaaa hukut di bapa Uka pe lango kamen nigun rae we .Muan tou nae kehukon kehujat nemuron hamu,goe lodo pe lango nigun di gete nae ni " moe piin a hena ne..kehukon kehujak maan be guok hamu ..." nae tapan goe ni " moe moe ..goe goe..goe piin ni wi kaen..ekan ekan dijangan jangan " nekun goe marin Bapa Uka we aten onon nae mae loke,ate kediken weken kaen nae plala plea mae loke...

Hukut tou muri hama ni wi..titen piin wi ne tarunan noon hamu ...hae ata kehukon kehukon loke,hae ata tukang wedan wedan hamu.morit piin wi seba a ne..nekun tou ...kawen gere bote ana ..mengase rae ...ekan gelupa weli gereja ono,sembayan we ekan digelupa..leke kontas pe saku ono we....malam bae kaka arin goen weken kaen..pali wali goe hukut hama weria nolon mor

Wekik badan

Rata  = rambut
kotok = kepala
tenogel = dahi
bahu   = hanak
iruk = hidung
matak haunk = bulu mata
alis= alis
kelipi = pipi
nuhuk= mulut
ipe = gigi
kumi = kumis
tiluk = telinga
mata kokon = bola mata
limat = tangan
siku = sikut
semuit = kuku
alek = perut
tuho = susu
korok = dada
kepuhur = pusar
wekol= pinggang
koak = paha
uo = pantat
lotor = lutut
leik = kaki

kodi sambo muri..balik turuk kia....

Wekik noro mae hala ... Belaran berihank

Nokon piin onok sama kolon,wekik sama pelate dokter marin pelate sain 38.7 sama dijejenk...turuk napun gakat belone sama hege hege.Pela goe hukut nene mama goen marin wekit kalo noro bain elen berua we weli lepo ata nona lolon we.Seba pia ata banjar / bale desa erent ata nona pukon tou,pai udun kewae goen hamu wekik goen .Nekun kewea ata jawa muri asal ne hamu sajan meten geka di.Nekun goe marin nae .."piin wi maen gila hala o oa...nemuron nain wi !" Dokter di nein pelea oba di aja loke,tenun di kedagel hamu di.Kae we goe gere turuk bunuk ne kaen panja galuk sama puna polo wekik ewun mihik .....Pali wali goe hukut hama nolon mor..............malam bae...santo pelindo goen...Malekat pengawal goen....santo Antonius Padua...santo Ignatius Loyola...mama goen ..nene pa nene nene mama goen eeee goe nenan sembayan soron goe berua ooo...malam bae ....