Bewelin hamu

Umpama naen wi ka kalo tahan kilo tou welin naen sain Rp.100.000 mio bisa maan pesta bisa mor ka take .Tite wi gesik ola tine hala kae.Rae marin olak di tana uran wai di noro pekehutun hala kae .Weken kaen mesen kerian jadi pegawe belen alant kia baru bisa sain hama ni. Nekun tite wi tekan tenun leron matan getan di peroin perokot loke nekun kalo pesta ka eret matat ono pai maka dein pana bera bera.

A toun ruan taan be pesta hamu , Pesta wi noi ne marin piin atan kaya raya alant ka atan ne inek anek tenaken di pusin peduli hala.Roho robak witi wawe toban wahak .Mio pikiran ka take wi ,pesta piin wi hama bua simala kama .

raan pesta mesen ne kengo renggo musik soul dun dan ekan punak ,hege ata naen pesta ata soul te aja maka lewo punan tutu naran naen ." ai nekun nokon pesta hebat...pesta te ga ? pe lali bapa .... langon !>  Ai ema e.. olak tenaken hamu nemuron di.

Eret matak kemakor ne pesta wi kia tite wi ka ( marin wekit hama ni halaku a ) naran naen kalo pesta onon maka weken kaen sain getan .nekun kalo sembayan lingkungan ka sosial toun ruan maka sama taa taa.

Nekun pi wi ata raan hama be opon akal wekit we  " taan pesta kia di ahala ...pesta wahak todi buka amplop ..pate lebu ele mihin peen we " . Aiiiiii mio eee sekola mion te ga onon ne bodo mion piin wi hama di keloton uon miten punan  wi...

hae marin ni i di " taan pesta hala kia ata lewo marin tite a ?" .Nolon ata raen raan pesta kae ,tite pana laran kae jadi pali wali tite taan pesta maka ata iker di sain te tite ka ?" .

Pesta wi hama taan be odi !! Tite marin tite wi meten modern nekun ata nolon te benisa daripada tite pi urin gere wi.Anak sambo baru tuun tou muri di tenuen tobo pikiran pesta kae.Nekun kalo tuun tou muri tamat sekola sambo te ga di tenuen roi hala .

karna a weken kaen welin ne belen bapan hamu maka tite opon akal wekit ni  " pana lali ka heti peli toko bosu ka tiu ... naen we , gute bon kia ,pesta wahak kia baru pate ele !! .

Goe paken aturan pesta titen we tenaken nekun tite wi be BENGANK loke ....

Wato Netak

muan tou rae Wato Netak
tana Mae ulin hau
gere gerakit pao pe Wato Kedosor
kemoko gike gero leik limak
tonga gere Keteke koton belen bapan tou keherat heti lodo
neken take di esuk pe lodo
halaku a hukut marin kalo Keteki hengat maka loa hala

Perubahan tradisi titen wi ...

Perubahan tradisi !!!!!

Nolon tradisi tou EKAN MAAN ATA ANA HAMIL ...kalo moe berani maka PATE DENDA ....pi hege tou naan mor ? Nolon we tite marin ar hama peen we naan eret matat  suku weken kaen sain miak, nekun pi wi kia palin take kae.Goe kaan pikiran koda geka berua di " pi wi kolon alan majan marin hala kae,geker digeker dongot ana kae !!! .Ar hama piin wi bisa berubah,bisa gewete nekun a naan ne a iker gewete bisa hala .

1/ Pehen pelae amut ...weken kaen nekun tobo geasok wekit hama ni " pehen ar peen siu a ne !!! " nekun hege tou berani pehen toa di guok lewo ono " pengumuman pengumuman ..kame kepa suku weken kaen geta laran lakan perenta marin pi lewo onon wo pehen pelea amut bole hala kae !!! kalo pehen pelae amut mor maka aturan adat yang pana wi .
2. Pesta mura rame  ........baiiii miooo eee tite piin wi hama di aho beroson we , pesta tou wi wawe sain koton polu legu we ...gen menun maan genain hena ne sain aja loke wali ? . Tite piin wi leron getan herun wekit nekun pesta tou kae maka tite wi kaka arin hala kae ...tamu tamu sain mesen tekan tenu .
3.Ekan gelupak oooo gereja peli we... nene oyan titen nolon we leron getan berajank peli gereja onon we,mae date pehen ne kontas tou tiwit ka habal pe hulik we.
4. Ekan di ekan irih hati ne ata iker oooo ...raen raen titen titen ...ekan di ilu geros...


ooo kae we oooo lera weli di lere kae..kowa di ekan noro baat muri ..goe ka balik lango kai kia .

Nuan uran warat

Nuan uran warat ,nokon doen turut meket bero tete tawa,marin hogo lodo tenesen tai nekeun noro tenakunt hamu ,halaku nuan peen we ata mula wata lango rekan hamu,tali ne wata belola gere kae maka lodo woho tai di mesen majan ne tenuen dore kola.Pas meket di wata lolon hae wejun wajan maka dien di hetuk mihin .

Mio e...mio e...

susa kaan kete pana
dore dein te ata tenesen hala
marin ilu geros diekan sain telen ilu
peen ata rayan nimun raen

lau plala plea
rae di tobo polen jaga kae
kuban belen
taan neka wata era di take kae
malu mara ape nutok hemo hala
tobo dapet luran taan merent hamu

moe marin dein pe kenawe wohon papa
dein ne kerimot ekepake tabal tisi uli wan kaen getan
hepat No ekan didein pele liko laran
balik weli tobo guk pe wowol onon we

pe hulan gerunk weli nai onon we
pe rae munak lako gike gero ata ola man netak onon rae nai
kuban belen leren wata era
tuak nawin habal hanan papa
jaga temae ekan kemekot pesil limat
jaga mae mae kudi leren ohan lipa matan kenen
jaga mio balik dai
tun tou muri kae di bego hala mor
mioeee mio ee kia ata kotok matak kedasen hamu sebole hae we

Laran Adat .....

Suku weken kaen ne laran adat naen masin masin ,pukon naran naen Koda ...jadi tite weken kaen kia taan be tulis hala ,hege ata bapan te benisan dore pana laran adat rete rawa maka kia rae te benisan .
Tutu koda goen pali wali pukon naen ni wi :
1/ Kitab Suci Agama wi ata raan be tulis nekun kodan ne artin naen aja loke titen wi tulis tou ditake wi kia nene pa soron bapa goen,bapa goen soron goe di goe kodi soron ana goen.Koda tite tete wi benolan noon ka take ? kia noon haluku ? .Tou tutu tou tali tou epu koda naan bene aja .
2/ Adat wi hege ata tukang pele liko ? tou marin ni tou peli papa marin ni ,naan bine kaka arin di majan wekit hala wahak pukon luan koda elen . Tite ne Tuan Allah nekun tobo koda adat kae Tuan Allah tite gelupa nain ,pukon naen kalo Adat onon we tite herun koda cinta kasih tenaken ...HEGE ATA NAAN NALAN NE KODA ADAT MAKA NAE TANGGO JAWAB ....peen we naan goe menyesal sama sekali .
3/ Ata maten hege ata yang tanggo jawab we....Gereja ka Lango Adat.Gereja nekun sembayan ne siren berkat wai berua di kae, nekun Lango Adat ,buun bain roho robak ,pasan tenda ,sepin sira,EREN PIRA kerian urusan ata maten wi tite bisa taan nekun TOBO weken kaen sembayan hena, taan tekan tenun  NAWA, ata maten tite taan roho robak sain wawe ulon pulo dibisa wi ? .Goe marin kalo goe jadi Bupati ka jadi Kepala Desa maka goen majan marin bapa suku ne ketua sukun weken kaen epu di goe marin MIO SUKA KA SUKA HALA aturan tekan tenun urus ata maten nekun sembayan ne tenu  wai hena !
4 / Tite wi kalo adat koda wahak hala mor maka sain cucu cece ence pelence wahak hala, pana majan pelala pelea wekit di gesik.
5/ Adat wi pangka naen bele loke ...moe dore maan mae mae hala maka koda keneruns teka mihin.Nekun goe onok marin adat we mesen ator tite naan bine kaka arin polo meten te mae...kewegon kenggo weol heti lagi bisa mopa. Naan bine titen kaka arin titen koda nalan tou maka pai detan hanan nae marin nae taan mae mae,ekan taan menekel sain herenai kepo kia baru tite tobo tani gilen garen ekan punak .
6.Umpama nae wi ....hae mata laran adat naen getan hala mor nekun todi toda robok laran adat naen lengat teka te ana cucun naen nekun mio hukut ka take ne nae yang mata nolo we ....nae kia maso surga onon ka take ? laran pate adat getan hala mor wi?



Koda kirin goen piin nekun kaan tulis hena polo ana cucu goen bele gere di rae di roi berua ....

Pa goen Inggu e

Pa goen Inggu sayange
pi laran legulon sepat to moe
nolon limak gewajan kebako batan tou
nekun pi weli nai kaan kete padu hena kae
moe moi ka take goe peten moe loke
onom moe kuran nekun tene hena di maan be marin te goe
ata iker moe maan tobo bemerenk hamu
sayang goen pa goen Inggu
moe hukut ka take tapo eu lali Lamawalan
pe hewak netak kerama kedila deket loke
lali Heras pe kajo pukon belen tou hutun
busan utan naan horon anan nae te hetun
pe lau Sabu Ina Poar kia uli peen nolon
nekun tite mehat yang pelewank pe lodo we
Rae orin rekan pao paja pukon belen tou huan nawa toren woel
leron hae herun ula Kemea pe orin peen we
nuan tahan weten tawa gere
besi ubun gepu soron mama rebos
sasi onon mean kenulun tenaken borik pe tana onon we
Wata belolon tawa gere sama belola kemerun di dore eran pehutun we
leron hae wewel bain kesaar legu wata belolon kajun di gero
Pekajus huan tajak lajak polen gadak pehutun we
rae orin ata Lewokun raen onon majan pelala pelea di sambo hala
halaku rae raan lango raen ne luo sain lali tana .
nuan peen kame kemosok hamu mor
kolon boun ne kolon But aja loke mor
nuan peen goe hukut loke mor
nekun kia goe tutu te hege ata muri wi .....
Pa Inggu e ..moe teti kelen onon kae
ekan onon kuran ne goe ...koda goen elen tou rua ne moe ka a tou ruan nalan noon
goe nena minta ampo ....sayang goen pa Inggu eee