Kenito piin eee

Leron hae pake hala sama sekali di kenito piin wi ,gelupa ekan sama sekali.kia ata marin teka vitsin ajak we noro nemuron ka genai di toi hala.Leron hae sama di kedasen .
Nekun nolon goe hukut sama sekali di ,nene mama goen ne kotak obat te ono naen we ekin nekun pel kenine hulo sain lema.Teka belaran berihan tene hena di terekuk pel kenine hamu di.Pel peen we tenun mesen gere turut mihin halaku bain sama odo di, Kae we goe lobon kopi berua kia di ,matak di keperepen ketun hala mor,matak tain di lap hala mor.Lagor gula kia...

Uran angi onon

Uran bele loke tobo dapet ape ,wekit noro kidi ridin ,ape hemo jebul pe gere nai.Gelete digelete halaku koi uran hama bo toi wai hebot we,gelohuk uran.dein pe lango tenesen teka wai uran srint srant bain sama padan.
Uran tabu todo tenuen belakin dein gere heti loteng hutun peresa lango uma belowor ,pe ke di seba gabus weli nena tenga kame bensin pe motor onon kete pai di temek gabus kete gere hopot lebut sen beuman peti heke dai.



   Uran warat onon pai pana lerin plali Ongo plali Heras,pana tonga gere tobi huan menuren kenen mor wi sama aja loke.Gere hagak tobi hutun di lau nena sia pe ata lewo leren rae kaan toto ne tobi menuren.Lali sain ongo onon pao Paja huan sama bele bapan toren woel sain pe orin hutun.Tite ola man ne Pa Belen Pei Larantukan ne ,Bapa Bolo .Rae ruak mengase goe mae loke.Doen mor rae guok goe kae ..."Nar eeeeeee pai pia wi perkajus kenuman huan sama bele ,pai gerakit oooo...." Keraman kedila we ekan belihur bain ,ekan srega bain we.Kebahi pukon belen tou pe ongo tenga we,kebahi peen huan kenaken nekun naen busan utan wi horon pe hutun hamu.Kolon boun di aja loke,tobo tula belebet . ...................kodi sambo muri ,jam kerian onon mor di...

Lango Kamen

Pana meranto peken lango ekan amun..piin gampa hala,lango peen kame morit susa sena weken kaen pe lango uma kamen ono.Nekun piin taan be genai wi.Lango ne elan bele mae loke...pendopo taan tobo tolo leit teka angin dihen pe lau dai ka tede gelinge nuha di mae sama sekali.

dapo kenen tou pe ono we kuban belen tou .Woga peen we goe maso dapo ono matak waink goen tetik pukon peten hukut mama goen.Nae newa ata nona ka hope muko lali Oko haka suka naen tao horon pe woga ,ne kara ka kota onon .Mama eeeeeee leron tou muan goe gete moe " mama e moe horon a tenahan doan doan loke di goe ait hamun oo...ekan horon muri ooo..pi lango ono nekun goe mehak hala ne ?" mama eeeeee....kame peken moe mehak prae lewo wali....tun tou rain kae..pene tene muri Natal ....bolo moe maan soron kame di goe gete hamun di...bolo kesumbu peen we ..onok sama berea nekun pali nokon goe peten hukut moe loke......Mama eeee moe mehak rae lewo iii ekan onom kuran pa Inggu kame moon hau polo kelean beran nae te haag kame...mama eeee susa tuja pe leron peen we...kame peken moe hala...malam bae mama..goe sembayan soron nene mama Peni ne Nene Pa Todo ..rae ruak sayang pa Inggu loke....
Goe pana kaan be genai muri..moe take kae....sayang goen eeee tobo detan korok hukut moe..mama eeeee

Onok kolon loke di

Kan kenun a elen ka..eret matak kehue sama sekali pali wali wi...tobo uli kerean heti lali bain alek sama hama bo remba we.bain sama menun.Kenun wai pelatin ,pije hulik di pohok bo bain lodo dihala.
Morit prae lewo to mae wi lepo ata lolon dihapun berua kia sare mihin wi.
Morit pi ata lewuk tana wi di senusan ajan hamu,ata marin prae lewo eret mata heti lali nekin wana nekun pi woho wi kerian hala tekan tenu hala.....todi nukut nakat pi weli nai wi

Peten sama peten loke mor

Lango goen rae doan kae
onok peten turuk pe tenidi
tobo pe meja belen ka lau huin dai di angin belina mae loke

suo lout pe dapo onon
tonga gere di noro mite loke
ape dapo nuhun pe gere nai
wojon peen ulun nawa hama peen mor

kelmatan ne jendela peen we taan gelinge berua
bo hege ata lewa ka
sen peti hutun di noro rusa dat kae
ebo di wanas gan kae
lango goen peen eee
pukon a ne kame pana peken moe mehak dein prae we
hukut dihukut loke
nokon matan getan turuk bae heti lali di sena hala
 pe lango peen we goe bele tawa gere...................

Muda pukon rua..Tapo pukon hiwa

Muda pukon rua,tapo pukon hiwa ,pao pukon rua belen bapan hamun tawa pe gere pe elan kamen .Oyan kamen nolon Luga Bethan ne Muku Kromen kia pikiran ajan belahan hamun .Polo ana cucu bele gere ekan dein temeden te ata langok erent maka naen rae ruak mula  a weken kaen getan pe elan kame di.

Sayang rae ruak Tuan Allah soron ana belakin tenaken berkewain telo Peni Bethan, Beto Bethan ,Amu Bethan.Goe kenen sain bele gere kawa ne rae telok.perenta raen we toir kaen " hari minggu we hamun elan bole hala....leron maka nemu mio kerian kae nekun leron tou soron Tuan Allah di bisa hala ka ?"

Nokon matan getan sembayan kontas getan, kuran kontas kenulun tou di rae roir.Tobo geke pe patun Bunda Maria erent,sembayan di sembayan jaha...wahak hala..

pi kia baru ata marin lango kamen noro pereto hala nekun nolon we pe lango kamen we weken kaen getan noon hamun.kame tawa gere sain SMP  di pe lango onon we ne doi benggol bele belen tou noon mor.

Rae marin pi gere bapa Uka tubak io kiko sama hebat nekun Oyan kamen Luga Bethan di kelenge sama sekali.Oyan tenuen titen pi gere di nolon raan ne pikiran belaha hala sain tulis ka foto tubak io kiko di tenaken sama sekali.taan be petutu nuhut ne tiluk hena kewenger.....ekan bekel matak goen odo sama sekali kae di...gere turuk kia ..bauk ere rua kia kodi sambo ulang muri...malam bae ooo

Moe teti Kowa Lolon kae.....

Tani mahin ...peten hukut morit hama hama pe nokon leron peen e ema goen e. Gere soga leik te kenatan pe lango tenga ,turuk di mesen ne tutu koda moen,kain panja moen maan be lebut tilun moen polo ang uran ble ekan naan moe selesma....mama goen e... mama geon eee...kaan pana meranto ..meranto seba ganti nasib nekun gelupa peken moe prae lewo tana...ata heti lali plala plea moe,nekun moe ne lein liman moen kelea hama bo kewikit sama peduli ne koda gahin ata iker hala.

Penoko wati mor moe hogo mete hugo ne basi belen tou tobo jaga lau air Nuha kae..jaga tiu Beda Marang hawe pukot .Ikan Wara ka ikan Teban ..mete duun pe heti jawan nai...moe gesik logek sendal hala.Sendal nekun moe logek maan maso gereja ono.Untu nekun ratu lema hena ikan wara welak tou.Teratu moe soron pa naan hope tebako sek.Teratu gula pasir,sisan iker moe neka te dompet kenen tou sekit pe belone huint .

nuan uran angin onon ,penoko wati moe rae gepu ue lolon ne moton lolon,paja huan ne paja puhun .Lerin pe heti nai we...balik hau leron hae we moe hopo muko ka roti soron kame...mama eee...morit taan cinta kasih mae loke..jasa moen sorn kame aja loke...

Leron muan teman goen gete goe ni .." kawan ne..moe miak hala mama moe lega duun ikan ne hulun nete nawa ..." ...goe tapan koda tou ditake ..kaan merenk hamun.Nekun leron getan goe tobo pe lango niggun heti we..kaan be marin moe.." mama ..leim moen gelek hala....pana laran logek ne sendal berua ka..lera pelate loke tali ne aspal bura pe gere nai we..." moe tapan goe " goe kaan pana hoge habit hala.."

Goe pikiran bisa bangga sama sekali bisa pana meranto..seba ganti nasib..polo bisa hope deko labu nimok,nekun goe gelupa toda moe hala ..goe tobo tani nokon getan hukut moe...mama goen e....tekan wata nalin sama kuma kuma...libu nekun moton lolon ..kame proin hala sama sekali...kame nekun rejun deko tou labu tou...sayang peen pe leron peen ata iker raen a baran huun hamu...pa goen marin " inem anem moen tenaken ekan di lega bengank we di..ata weken kaen di roir hamu...tite piin inet anet tenaken....ilu ekan geroz ..ekan dein pe ata langok erent maan hama temeden we..peen bole hala......Mama goen sayang goen ee....herun wekit hala kae nekun..goe bain hama moe pi haak goen mor......tuun tou ..leron telo moe teti kelen hutun kae....goe kaan sembayan di koi hala nekun atek goen onon menun punan ne moe..mama goe eeee.....tede goe berua ..sayang goe ....

Morit ne bine tenaken guna take sama sekali.pana laran di bisa hala tobo te ape dapo di bisa hala.Ata raan pesta ka ata maten te lango ono peen sama di senusan.Tenuen raen nolon ne kantar we"Sayang go binek gawe nolon logek labu renda tiwit keranja...." Titen bine take maka bala di maso take.Marin taan pesta kawen di hege ata soka selen hode tite...Bine e mesen morit ne bine tou dimaen.Bine take suku meten tali bele ,lewo meten bele ne suku goen nekun marin tuat bauk ere rua bine take wi hege ata to tede moe.Rae ne bine noon we pikiran tenaken kae ,sena sama sekali kae,kelean beran majan marin bine mae di mae loke.Bine welin bala...pai bine goe soka selen hode moe dimaen....................

NUHA WAIBALUN

NUHA WAIBALUN

Uran mete geriit,tobo tine ola etan mor,wata ladon kae nekun matun ne kelike tawa sama rebet pe gere nai we.Topa besi hutun deket sama sekali .Keduo wekak beka eran pe ratan naen nekun naan meren hamun ,gelerek nekun pukon liman nae milan muri naan naan bo bo pusin hala nain we.Nae segat lodo teka ula walan belen tou nekun liman naen piin wi hama bo ata lokek ne besi ka a ka di pesen senaun.

Sasi naen pukon rua tawa sama berohik,nawa rebet rebot,huan botor nawa ta ekan te we nekun nae pikiran sasi piin meten bele takut ne tutun ka ata kediken olak tenaken limak noro gelerek rewan rala sasi wali maka nae guit tana uman di nein maso sasi pe ono  we,heti hutun nae lebut ne matun ka wata lolon .

Lela meten lela kolan naen kia noro hugu berua kae wali jadi nae dein gehan herenain naen berua,gute wai pe derijen mean kenen dilobon.Dein liman seke te hanan naen meten gelinge ata kediken hae meten pana pe rae nai we.......................pe leron peen goe hukut sain pali wali mor

ONGO KAI

Lerin pe rae ongo Wato Netak ,sekola balik ema goen udun nawo bapa goen keniki rae ongo,kan kenu bohu di lerin kete pe Kota Lolon rae nai we...pe dahen te  herun Nene Bosu Juan ne Nene Tontu ,majan pelala pelea rae ruak mae loke.Wata menutak ne serbe ,mama marin ekan gelike we pana e..tiwit mae mae we.Kerama kemimi di aja loke .Logek sendal di noro ketun hala muri,sendal welin ribu lema  di hope tewe rehit.Doen mor goe guok pa goen naran..Nae honik nekun ran naen noor kesaar berua.piin kia pa goen alen malu sama sekali kae di.Nae tobo ledan kolan pe orin tuak pukon lodo we.Goe buka menutak kaan kelean beran hamun ,peten hala ku a,lera pelate pelate di tine ongo loke,kolan bo teneher hala kae.Nae sowak kenatan naan laen di tobo pe hutun.ikan nebe kenewit tou,hulun moton ,wata kenuman sampor ne tahan buran.tahan buran gelas tou wata kenuman gelas rua.Naan tanda kros di wat goe.."moe gon kae ka wati ni...ruat huro muri di maen ..pa tao sisan soron moe e " .Take pa,goe kan kae di pela we,piin peken lamak moen di..." "o kale ne pa huro ke wi e , coba moe lau tonga pao pelen pe lau we neku pa noi noro kenuma berua kae nekun marin gere gerakit kemoko lodo benen gike goe...moe leim te kelea we lau gere ke we ".Goe onok berea pali ee sama diberea.Pelae kelean beran hamun,seregu lamatoro di peduli hala sama sekali.Goe tonga gere we ne nemuron sama sekali pao pelen huan tenahan sama kuma kuma.Gere gepu di lodo kete tobo isek pe Wato Kedosor hutun lodo.Meten isek meten kantar " sayang goe binek gawe nolon loge labu renda tiwit keranja." Meten kantar goe bain Nene Tony Bethan huk bek witi anan naen,witi talin gelahuk pelae mete pe ongo kamen onon pai.Nene Tony Bethan peen mae ne goe sama sekali.Netak naen onon ne muda pukon tou huan sama kemi.Nae newan nete soron goe di marin ni " kantar maan mae mae siu we no.dai muri iker mete ne panci matan ne be le we .."  Pe leron peen goe hukut kete kawa...morit doan sain te ga kae di goe rekun ne Lewo Tana goen koda kenirin

Gelete geluwor

Penoko wati pali wali tobo pia watan Pura Batu Bolong Canggu ,angin dihen pe eke dai sama di sena ,gelete nekun tobo peten hukut kala lewo goen.Doan rae doan piin sama doan,tobo kaan merenk hamun.Tede weli kujo kerakat plae ne beran hamu.Ata marin tobo mehat te watan pikiran si sama belina.....penoko wati piin wi goe peten hukut lewo tana goen ....lewo goen rae e pe Ile Mandiri pukon dein........

TUTU KODA

Nolon ata ema ema mesen tobo pikiran lera meten helut gere ,rae mulai majan ana ana raen bera balik hebok.Meten hebok ema raen gete.."moe tor ka take pali nokon mama tutu koda "Onot berea loke oooo..tobo jaga teka nokon wahak marin dein gere uli lolon ema titen nein pelajaran sembayan..santo santa pelindo we lain matan getan ooo.Gute leke lipa bunut sama puna.Turut meten napun gakat ema titen di mulai nae petutu koda....petutu koda paling aja biasan naen we KOLON POHONG...ne WATO BEDAON....nokon matan getan..ana kenen tou sain ana kenen pulo di tutu koda hama hamu....nekun tite ana ana kewenger mae loke.Onot sama berea..hama ata marin kalo tite kewenger tutu koda wati mor maka turut di odo hala ooo....