Pi laran meranto

Pukon deko tenaken ..labu ditenaken ,tobo pe tenesen hama bo ata inek anek tenaken,taan meren meren hamu,majan kerian rae ola sokot matun,leba wato utan,belo kajo reo,lau helen uho,lali maan wato mean,kerian di kerian buun bain polo ait doi sen tou rua berua. Hide di hide loke.

Leron tou tema goen tou gete ni ."tema e meranto lela loke kae di e..kia balik lewo hala kae ka genai ...! Goe marin tema goen peen ni 'tema e taan be a wi piin wi taan reken pana seba ganti nasib wi....hama moe moir we morit piin genai ...kame a kamen tou di take wi...mekan menun di senusan hamu,pile laran meranto kia te mae hae ka..tawa lewo ono kia hege ata tou ne tede tite...nekun rae paken tite piin atan inek anek tenaken " .

Morit nolon sena di sena loke...tenuen ruank sayang kame mae loke,sembayan keluarga we dilain hala ..nokon matan getan pehen ne rosario tobo pe lango tenga pasan ne padu tou.Tuan Allah nodi soron ator morit titen masin masin.

Pali goe di noro sadar halaku ..meranto piin wi pake hala sama sekali...peken lewo tana..peken ema meha prae ...nolon onot gesik loke lega turuk ata lango umak nekun bele gere hama mama goen marin ni " no eee mio piin ee meranto mion piin ge sain ile Mandiri bolak di mio balik hala wi.." Mama e,....goe mendar sama sekali di peleron nawo moe weli berobok onon we...tobo proin onok..tobo detan korok ...goe marin....<.Heee atek bolak pito peten nuron lima naan liman inan  tawa ttake ....meten dein pohe lerin liman take goe atek goen take.....> kantar goen peen goe kaan meten tani meten pana hagak motor lolon kewenger moe rae lewo here nain wahak kae.

Mama e...sain pali wali goe hukut moe loke mor ..leron hae maso uli ono matak goen tani belurunt hukun peten moe .Moe marin wekim moe kerogon ,goe udun moe hope wewe,menun kae nekun ulin mor hamu.Moe telpon rae hau marin semuit lima ina moen bakun.Udun moe lali mete peresa balik haka marin peen hama teka gula gere loke.Penoko wati moe telpon marin lima moe temihe aja loke...goe bene hiin kala moe ..temihe anen ne rogo rega te lima moe ono.Nekun goe marin moe genai goe genato tiket pi rae di bauk moe hau.Seba hege ata bisa nawo moe lali maumere di kame hode moe pia .Moe nekun koda tou .pa pia kia ne hege ata.Rebaon naen goe marin muri genai bauk goe genato tiket e.Moe gesik .Tobo koda ne kaka arin telok akhir naen kaka belen marin nae balik lango.bauk hope tiket soron nae nekun onok sama pelate di,pesawat jam 11 legulon nekun nae jam 11 45 telpon goe..moe telpon pesawat marin goe telat ....koda goen heke..tobo kaan meren meren goen di...telpon rae lewo mama goen rae roon teti ruma sake kae.telpon di koda take kae..nokon tou te ruma sake bain moe take kae.ATEK GOEN BOLAK PITO....tobo tani mahin pe laran rekan ..kaan be genai kae wi...piin genai kae wi.....leron getan kame telpon wekik...legulon rebaon telpon terus ..heke hala......"Ema goen take pi lango onon ,morit pii susa hae e ema sare ...! Ema goen e.....ema goen e....

Tapo

Sain oyan kame mata di goe gete hala mor,pukon a ne ata iker bisa mula tapo te elan kame ato kame mula tapo te ata iker elan .
Nolon kia rae raan koda kaka arin wi nemuron hamu ,kaka arin rapa loke.Pi wi nekun dein lango nigun nena sia sili di ata marin tite temeden .Tapo hae gere sain belola loke di ahala di. Lewo onon nolon tapo aja loke.Pukon pasan kabel listrik wali ka geto lotok weken kaen getan.Kame nolon lango rekan sain tapo maka pukon pulo golek lango...tenuen nolon kia dipikiran tapo pukon tawa gere we hama niha  ka batas tana ekan titen.....