Angin dihen gelete mae loke tobo wato lolon dahe ne tobi pukon tou .Tobi lolon kenuman lengat paon paon dore angin walas.Niku lau kujo saka rakat pe wato lolon,limak nekin tobo olak tenaken gute wato hewak kujo peen.Lera meten lere onot sama berea polo bisa dore gimank ,niku lali kolon bok beka sama kelae kelea maso pe kewakat ono lali nai.Kolon boun tou rua di beka seba kawak naen.Doen pe lau papa ata hae be guok “keloba ..keloba..keloba “guok ata bapa peen meten legat ne keturak. Goe pata coba dore lau tede ata bapa peen.Ai teka nemuron di keloba koton belen bapan .” Ai bele loke wi tiu “ goe tede noro tenakut karna keloba lein lima rogo rega pe kuturak “lege tiu …lege tiu “ geo dein pe tiu Toni haank .”Ekan takut no ,piin a hala nekun keloba hena di.tiu iwit gere di beretek pe wato hutun di mata ka “ Tiu Toni pohin marin goe pukon naen nae tede goe hama noro tenukun berua .Goe kelas lima SD mor jadi toi keloba belen hama piin wi bain hama toro tenkut hala ku pukon ata tutu koda marin kapal Tampo Mas lemek karna keloba raksasa isek kapal sain lemek."Kae no tiu ait kae " meten gike wewel tiu Toni beretek keloba belen bapan peen sain mata."Tiu ..tiu ..gelerek ka take pela waktu ak e tereket pe limam moen ?" goe gete tiu Toni nekun limak goen meten sento keloba koton. " Ai no e..gelerek hala nekun bain rasa hama genai ka ..tereket naen peen we naan tiu takut...ata marin kalo nae tereket sain kelik maka bahaya loke peen we !" ."Bahaya genai tou tiu ?" "Ata marin wi ka no kalo tereket maso kelik maka tite bisa mata o " " ai nemuron ka take tiu " ."nemuron ka no maka naen kalo nae tereket sain pe limak gere kae maka besa kelea kelea o no ". naan goe bene takut ne keloba di ."pi no tiu soron moe keloba lima rua mete balik heti tono gon ". "terima kase Tiu , goe kan suka hala di keloba , goe pesil ikan kemalu ne ketuko kia "
------------- sambo muri wati mor ----------------------
Tidak ada komentar:
Posting Komentar